Heb 1 | LID | STEP | Bwena mene Kindrei asehek sahou ili ta tubu taha iri san solo-an, ma i san solo-an labai ili tiri propet.

aWari 2:7

b2 Samuwel 7:14; 1 Kundruh 17:13

cDutoronomi 32:43

dWari 104:4

eWari 45:6-7

fWari 102:25-27

gWari 110:1

Hebrews 1

Jises badeh, udu bwele-en labai ja tiri angelo

(Kalan 1–2)

Nadu Kindrei udu bwele-en labai tiri angelo

1 Bwena mene Kindrei asehek sahou ili ta tubu taha iri san solo-an, ma i san solo-an labai ili tiri propet. 2 Arile udu bolo len tataha hamon kada-ah, Kindrei asehek sahou eme tataha i san ta nadun ari le mwan. Kindrei leheyani nadun doh ta akohok iri lakou marakon. Na nadun le, iy bwidi lakou marakon asahan. 3 Nadun doh leheyani lomada sun tinan ta taman Kindrei, ma lomadan tinan labai eme tataha, ma konen mara-ei i buku le Kindrei amwenen. Sahou tan nyamun labai, ma tawi iri lakou marakon udu munyak ma kandrah. Iy ndrabwidi gok tan ndrano ta talou iri mwan ma badih ado ta kandriyen ndra-in, ame ta kandriyen mwasin. Ano iy ili manyah udu kandrah mine Kindrei salin, iy boto-on labai. 4 Iy udu bwele-en ja tiri angelo, i buku le Kindrei tondrohon nyaran udu bwele-en labai ja ta nyara iri.

5 Bwena mene Kindrei tiye i ta nadun i buku doh,

“Ou naduk handru,
Na dah jo ndrasahan tamam kabwe.” ^a
Kindrei basehek bala toro angelo tan bala buku doh bwe.

Arile iy asehek nadun:

“Jo kameh tamam, ma ou kameh naduk.” ^b
6 Na len Kindrei anya katiye nadun ari le keme andri kon munyak, iy eme asehek:

“Iri angelo ta Kindrei katehei bwili ndru-u iri ki andri kili tan.” ^c
7 Iri angelo tan badeh, iy batehei budon tan mara-ei bala tiri bwe, i buku le buk ndrabun ndrasehek:

“Kindrei bwidi iri angelo tan asahan i buku siyer laleyah, ma iri lau ta amekes lahou tan anya i buku jih nyarahan labai.” ^d
8 Arile iy asehek ta nadun:

“Tondrok tam, O Kindrei, ta udu le buku doh, winiyan bandra-i bwe!
Ou tondrokei iri lau tam kado le tiri kandriyen mwasin.
9 Ou aso-ok kandriyen mwasin tinan labai, ou bwalem iri kandriyen ndra-in.
Eme ma Kindrei tam amwenen ndranyahani ou ndrala loken labai, bwele-e oro lau tam mwasin.
Ma iy mene solowei ndrelekei ta sekesek ndrawek bwele-em.” ^e
10 Iy asehek ta nadun ale:

“O Laban, ndra bwena mene ou bwidi kon munyak, ma, na minem amwenen ou bwidi kandrah ja.
11 Uru ma la-uh kameh amai laleyah. Arile, ou le ari kameh are le buku doh. Uru ma la-uh kameh i buku ra-ei kolau ili malen, ano atarah.
12 Ou kameh lukumwi uru i buku ou alokom kolau malen, ano ou atehei kolau ha-un ili turu, ma uru asahan randrah ja. Arile ou kameh areu le buku doh, ma jaha tam kameh udu luluwen labai.” ^f
13 Kindrei winiyan basehek bala ta ari angelo tan bwe:

“Ou ame manyah ado loboho minek salin, winiya jo le baratehei iri lau ta amekes budon ndra-in i tam barado bahandra katim.” ^g
Kindrei asehek sahou doh ili ta nadun amwenen.

14 Iri angelo badeh, malawi iri le, iri ta amekes gok ta Kindrei. Kindrei tiye iri ala ta aseben lau, ta akohok iri kame hamon ja.